Naxçıvanda fəaliyyət göstərən “Yaşıl dünya könüllüləri” qrupunun üzvləri mükafatlandırılıblar
"Yaşıl dünya naminə həmrəylik ili" ilə əlaqədar Naxçıvan Muxtar Respublikası Ekologiya və Təbii Sərvətlər (ETSN) və Gənclər və İdman nazirliklərinin birgə həyata keçirdiyi "Yaşıl dünya könüllüləri” proqramına yekun vurulub, 53 könüllüyə aktiv fəaliyyətə görə sertifikat təqdim olunub.
Dekabrın 25-də qurum rəhbərlərinin iştirakı ilə ETSN-də hesabat tədbiri keçirilib. Tədbirdə Naxçıvan Muxtar Respublikasının gənclər və idman naziri səlahiyyətlərinin müvəqqəti icraçısı, nazir müavini Məcid Seyidov, ekologiya və təbii sərvətlər naziri Xanlar Mustafayev Prezident İlham Əliyevin liderliyində özünün yüksək inkişaf dövrünü yaşayan Azərbaycanın COP29 kimi qlobal miqyaslı tədbirə uğurla ev sahibliyi etdiyini, mötəbər tədbirin əhəmiyyəti və nəticələri barədə fikirlərini ifadə ediblər.
Ölkəmizdə elan olunmuş “Yaşıl dünya naminə həmrəylik ili” ilə bağlı muxtar respublikada həyata keçirilən işlərdən danışan rəsmilər, birgə əməkdaşlıq çəçivəsində gənclərin, xüsusilə “yaşıl dünya könüllüləri”nin iştirakı ilə sözügedən mərhələ, eləcə də COP29 ilə əlaqədar atılan addımlardan bəhs ediblər. Qeyd olunub ki, ilin əvvəlində "Yaşıl dünya könüllüləri" qrupu yaradılmış, müxtəlif ekoloji aksiyalar təşkil olunmuş, maarifləndirici və təşviqedici işlər görülmüş, kütləvi idman yarışları, müsabiqə və düşərgələr təşkil olunmuşdur. Naxçıvanda ilk dəfə keçirilən "Greenfest"in təşkilati işlərində yaxından iştirak edilmiş, həmin tədbirdə fləşmob və əyləncəli oyunların təşkili tədbirin dinamikasına əlavə güc qatmış, panel müzakirədə gənclərin də fikirləri dinlənilmişdir. “Yaşıl dünya naminə həmrəylik ili” ilə əlaqədar hazırlanan təşviqedici posterlər Naxçıvan şəhərində, Babək və Şahbuz rayonlarında bilbordlarda yerləşdirilmiş, “Greenland – Nakhchivan” facebook və instagram səhifələrinin yaradılması və fəaliyyətinin təşkili uğurla icra olunmuş, “Old street, eco-art” adlı rəsm və əl işləri sərgisi, Batabat ərazisində ekodüşərgə və ekoyürüş, “Yaşıl Azərbaycan gənclərin gözü ilə” adlı onlayn dizayn müsabiqəsi, “Ekoloji tarazlığın qorunmasında gənclərin rolu” adlı tədbir keçirilmiş, təbii resursların səmərəli istifadəsi ilə bağlı debat çempionatı keçirilmişdir. Yaşıl dünya könüllüləri”nin həmrəylik yürüşü, müxtəlif ekoloji aksiyalar, kros qaçışı və veloyürüş vasitəsilə cəmiyyətin diqqəti ekoloji problemlərin həllinə yönləndirilmişdir.
Rəsmilər təşkil olunan tədbirlərdə fəal iştiraka görə yaşıl dünya könüllülərinə təşəkkürlərini bildirib, bu sahədəki tədbirlərin bundan sonra da davam etdiriləcəyini diqqətə çatdırıb.
Sonda “Yaşıl dünya könüllüləri” proqramını uğurla bitirən könüllülərə sertifikat təqdim olunub.
